Regn í maí

Það hefur rignt nánast síðan ég kom aftur til Toronto. Við familían áttum einn dag saman áður en Orri stakk af til Íslands til að spila á tónleikum og lóðsa um landið fræga útlendinga. Undanfarna þrjá daga hefði ég alveg verið til í að vera á tónleikum í Reykjavík en sem sárabót fyrir að vera ekki í Fríkirkjunni á þriðjudaginn fór ég á uppákomu sem að vinkona mín úr skólanum skipulagði ásamt öðrum kraftmiklum konum. Þetta var blanda af dansi, ljóðaupplestri og tónleikum, auk þess sem hægt var að kaupa lottómiða og vinna ýmsa nytjahluti eins og tauservíettur með ljóðum á, útsaumaða dúka, skrímsli, ljóðabækur og annað heimagert dót. Þær eru að safna aur til að geta lokið við uppsetningu á dansverki sem er í smíðum. Þetta kvöld var ákkúrat eins og ég hafði ímyndað mér að ég myndi vera á vikulega samhliða mastersnáminu. En eins og ég hef áður sagt þá hefur lítið farið fyrir “menningarlegu mér” sem sit með rauðvínsglas og horfi á dansspuna eða með ljóðabók á kaffihúsi. Ég á náttbuxum og lopapeysu við tölvuna er ekki alveg eins rómó, og þó..
Í öllu falli var þetta skemmtilegt kvöld. Ég fyllist alltaf krafti þegar ég fatta hvað margir eru að gera skemmtilega og spennandi hluti í kringum mig. Þarna var ein stelpa með kassagítar sem heillaði mig sérstaklega (ekki sakaði að hún heitir Harmony) og önnur sem las upp svo skemmtileg ljóð um brösuleg ástarmál eldri systur sinnar og rósóttan sundbol ömmu sinnar.
Lokaáfanginn minn er hafinn og heitir “Drama and Poetry of Slavery”. Þessa viku lásum við tvö leikrit eftir Euripides (The Trojan Women og Hecuba) og umræðurnar í dag lofa góðu um framhaldið. Kennarinn heitir Nyquist og er af sænskum ættum. Hún leggur áherslu á pólitík og feminisma sem er mér að skapi.
Kári hefur slökkt á graðfola rapptónlistinni og hættur í leiknum sem hljómaði greinilega sem útileikur en ég nennti ekki að stoppa. Nú vill hann fá mig út í fótbolta. Eyja er á skátafundi eða öllu heldur á “Girl Guide’s meeting” þar sem þær eru að skipuleggja útilegu um miðjan júní og alveg að springa úr spenningi. Held að við Kári sleppum júróvisjón glápi í gegnum rúv og horfum á Grizzly Man. Það er of mikil rigning til að spila fótbolta.
Heyrumst,
Þ.