Gleði, gleði

Jæja, nú er sko kátt í bæ. Ég skilaði síðustu lokaritgerðinni af mér seinnipart föstudags og það var hrikalega góð tilfinning. Þar með hófst afmælisundirbúningur því á laugardag héldum við upp á afmæli Kára og buðum öllum strákunum í bekknum í pizzu og kökur. Það var að sjálfsögðu mikið fjör og Kári segir okkur að frægðarsögur af íslenskum rice crispies kökum fljúgi um Dewson PS. Á laugardagskvöldinu vorum við svo með matarboð og glögg fyrir þrjá vini mína úr skólanum. Það var mjög ljúft en okkur Orra þótti þau léleg í glögginu og vorum sammála um að íslendingar hefðu ekki farið heim fyrr en potturinn væri orðinn tómur. Gestunum til afsökunar þá átti einn að fara í flug eldsnemma daginn eftir og ein átti eftir að skila tveimur ritgerðum... en eins og ég segi fólk hefur nú ekki látið svoleiðis smámuni stoppa sig í að drekka vel af glöggi. Á sunnudaginn var síðan afmæli Eyju fyrir stelpurnar úr hennar bekk og það var ekki minna fjör en hjá strákunum. Ég hafði búist við meiri rólegheitum en feluleikur, stoppdans og blöðrukast kosta þónokkra skræki. Þegar Eyja greyið var að kveðja síðasta gestinn sinn, hrasaði hún í stiganum og tábraut sig. Sem betur fer var það ekki mikil sorg og í dag haltraði hún í skólann. Seinnipartinn stendur til að sjá Narnia í bíó en á morgun kemur Sifa til okkar og það er að sjálfsögðu mikil tilhlökkun að fá ömmu. Mér skilst meira að segja að hún komi með hreindýrakjöt og Nóa Síríus konfekt þannig þá ætti okkur að vera óhætt að halda jól. Nú ætlum við skötuhjú að kíkja niður í bæ og fá okkur kaffisopa á Bulldog. Það er svo fallegt og jólalegt úti, snjór yfir öllu.