Canada Day, fótbolti, þvottabirnir og hitamolla

Sit við tölvuna í íbúð Alexar og hlusta á flugelda. Í dag er þjóðhátíðardagur Kanada og flugeldasýning við höfnina. Í gær flutti ég úr íbúðinni okkar og er eiginlega strax farin að sakna hennar og hverfisins. Við bjuggum í Litlu Ítalíu og það var svo rosa mikil stemning í kringum heimsmeistarakeppnina að hverfið sem er venjulega líflegt var hreinlega að springa af orku og testestoróni. Á öllum kaffihúsum og börum er búið að setja upp stóra sjónvarpsskjái og fólk klætt í fánaliti Ítalíu, Portúgal og Brasilíu er á hverju strái, enda Litla Portúgal við hlið Ítalíu.
Það eru þvottabirnir á svölunum hjá mér og ég er alltaf að gjóa augunum að svaladyrunum, viðbúin að sjá þá búna að opna flugnanetið og hjúfra um sig á eldhúsgólfinu. Það er bara of heitt til að ég geti lokað.
Best að setja viftuna í gang og reyna að sofna.