Haust í Toronto

Það er kominn tími til að segja frá hversdagsleika okkar hér í Toronto. Ég vakna venjulega fyrst og tek strætó í skólann. Orri og krakkarnir leggja af stað rétt fyrir níu og labba bara út götuna til að komast í Dewson. Í hádeginu fer Orri með gott nesti til krakkana og situr með þeim úti í garði á meðan að þau borða. Það er ansi notarlegt að hittast svona í hádegismat og ég reyni að koma með á miðviku eða föstudögum og borða hádegismat með þeim. Núna er farið að kólna þannig að stundum koma krakkarnir heim í hádeginu en við erum að spá í að láta þau fara að borða nestið í skólanum frá og með nóvember. Þó þetta sé indælt og Orri sé alsæll með að eyða hádeginu með krökkunum þá slítur það vinnudaginn dálítið og nú þegar krakkarnir eru búin að eignast góða vini þá finnst þeim alveg eins gott að vera með þeim í og borða nesti í leikfimissalnum. Orri er kominn með vinnuaðstöðu í Gallerí 44 þar sem hann er með ljósmynda aðstöðu en mér skilst að hann komist ekki inn fyrr en 2.nóvember. Við erum heppin með kokkinn því á hverjum degi er veisla. Orri eldar súpur og kássur og er sífellt að betrumbæta uppskriftirnar. Hér í grendinni er ódýr heilsubúð sem við notum heilmikið og það er hægt að lifa góðu lífi með tiltölulega lítinn aur. Auk þess að búa til mat höfum við verið að baka heilhveiti pönnukökur með hlynssýrópi, litlar formkökur með appelsínuberki og ýmislegt spennandi. Kökusala Eyju og Louisa um síðustu helgi gekk rosa vel. Þær seldu 84 litlar formkökur/múffur og sendu ágóðann til fátækra barna í Afríku. Um síðustu helgi leigðum við líka bíl og keyrðum út fyrir bæinn að skoða sveitina í haustlitum. Við tíndum epli (sem við ætlum einmitt ma. að nota í eplaköku og pæ) og fundum stórt og flott grasker sem við ætlum að skera út í fyrir Hrekkjavökuna. Við tíndum líka falleg laufblöð sem er verið að pressa. Það er frábært fyrir mig að taka mér pásu frá lestri og fara út þannig að ég er ánægð með hvað veðrið hefur verið gott. Var ég búin að segja frá Þakkargjörðarhátíð Kanadabúa? Hún er haldin í byrjun október en ekki í lok mánaðarins eins og í Bandaríkjunum. Okkur var boðið til Guðrúnar og Greg ásamt heilmörgum vinum þeirra. Maturinn var frábær og skemmtilegt kompaní líka. Það besta við þessa hátið er að hún er ekki trúarleg þannig að allir geta tekið þátt. Við vorum kannski sextán plús krakkar og flestir komu með eitthvað. Mér finnst svo frábær svona samskotamatur því þá er svo margt að smakka. Eyja og Kári voru líka svo glöð að vera boðið. Þau spiluðu borðtennis og matador og horfðu á Wallace and Gromit og voru hæstánægð. Af öðru sósíallífi þá fór ég í partý til Linda Hutcheon sem er kennarinn minn og það var mjög gaman. Ég er búin að kynnast nokkrum nemendum vel og finnst andinn í enskudeildinni almennt mjög fínn. En talandi um skólann þá er best að ég haldi áfram að vinna. Kaffipásan mín ætti að vera búin. Ég, Orri og Kári fórum áðan á Bulldog Cafe sem er langbesta kaffihús Toronto. Við leggjum á okkur strætóferð um helgar til að fá okkur bolla og spjalla við Stuart, Paul og Wally (voffi) sem reka staðinn. Eyja fékk að gista hjá Louisa síðustu nótt og núna eru þær á vísindanámskeiði í háskólanum mínum. Námskeiðið er annann hvern laugardag til jóla og er fyrir stelpur á Eyju aldri til að hvetja þær til að taka þátt í stærðfræði og vísindum. Ég er spennt að heyra hvernig þeim fannst því í dag var fyrsti dagurinn.
Bestu kveðjur til allra...nær og fjær, til sjávar og sveita.........
Þórdís